Mai Gudanar da Kuɗi ba Bisa Doka ba – Dantata Success and Profitable Company An wallafa: February 25, 2019

Securities and Exchange Commission (Hukumar), bisa ikon da Sashe na 13 (w) na Investments and Securities Act (ISA), 2007 ya ba ta, ta rufe wurin kasuwancin Dantata Success & Profitable Company (DSPC), a ranar 6 ga Fabrairu 2019, kamfanin da yake gudanar da ayyuka ba bisa doka ba a kasuwar jari ta Najeriya. Bugu da ƙari, Hukumar ta samu umarnin kotu na daskarar da asusun bankin kamfanin domin kiyaye kuɗin masu zuba jari, bisa Sashe na 13 (x) na ISA 2007.

Hukumar ba ta yi wa kamfanin rajista ko ba shi izinin gudanar da wani aiki a kasuwannin jari ba. Duk da haka, ya nemi masu zuba jari a Najeriya ta shirye-shiryen rediyo a yankin Kano, ya kuma karɓi makudan kuɗi daga gare su da sunan “tsararren zuba jari”. Ayyukan kamfanin sun saɓa wa tanadin Sashe na 38(1) da 67(1) na Investments and Securities Act, waɗanda suke hana kamfanoni ko mutane marasa rajista ko izini gudanar da kasuwancin zuba jari, ko gayyatar jama’a su saya ko su sayar da kowace takardar jari ta kamfani, ko su ajiye kuɗi a kowane kamfani na ƙayyadadden lokaci ko kuɗin da za a iya nema a biya a duk lokacin da aka buƙata.

Hukumar na gargadin jama’a cewa Dantata Success & Profitable Company da duk wani mai wakiltar ta ba su da rajista, saboda haka ba su da ikon ba da shawarwari ko ayyukan zuba jari a Najeriya. Hukumar ta ƙara gargadin jama’a su yi matuƙar taka-tsantsan kafin yanke shawarar shiga tsare-tsaren zuba jari. Hukumar na shawartar jama’a su riƙa tabbatar da matsayin rajistar kowane kamfani ko mutum da kayayyakin da suke bayarwa kafin yin wata ma’amala da su. Ana samun bayanin waɗanda Hukumar ta yi wa rajista don ba da ayyukan zuba jari a wannan hanyar https://sec-gov.onrender.com/for-operators/find-a-registered-operator/.